वीरगंज २७ , असोज । महोत्तरी पशुपतिनगरका धनीराम महतो दशैँलाई पनि छठ जस्तै रमाइलो गरी मनाउँछन् । पहिले-पहिले छठलाई विशेष पर्वका रुपमा मनाउने उनी आजकाल दशैँका लागि पनि विशेष योजना बनाउँछन् ।

आफू भन्दा ठुलाबाट दशैँमा टीका थापेर आशिष लिने रिवाज महतोलाई विशेष लाग्ने गर्छ । महतो जस्तै बर्दिबास पथलैयाका रामसेवकले पनि दशैँ फरक तरिकाले मनाउने तयारी गरेका छन् । दशैँ मनाउनेगरी उनको परिवारका सबै सदस्य घरमा भेला पनि भइसकेका छन् । सबैजना एकै ठाउँमा भेला हुने भएकाले उनले यो पर्व विशेष लाग्ने गर्छ ।

पहाडे तथा तराइबासीको सँस्कृतिहरूको अन्तरघुलनले अहिले हरेक चाडपर्व सबैको साझा बन्न थालेको उनको अनुभव छ । अघिल्लो वर्षको दशैँ कोरोना माहामारीका कारण निकै खल्लो बन्यो । मन्दिर तथा शक्तिपीठहरूमा पूजाआजा बन्द भएको र छरछिमेक, नातेदारहरूको घरमा समेत टीका थाप्न जान नपाएका कारण देशभर नै यसवर्षको दशैँ विशेष बनेको छ ।

मुस्लिम समुदायमा पनि दशैँ रौनक

मुस्लिम समुदायमा पनि दशैँको रौनक छ । मुस्लिमहरूको बाहुल्यता रहेको महोत्तरीस्थित सम्सी गाउँपालिकामा छिमेकका हिन्दुहरूले मनाउने पर्वमा आफुहरू पनि सहभागी बन्ने गरेको मोहम्मद फरान बताउँछन् । ‘हामी निराहार बसेर पर्व मनाउछौं तर दशैँमा मीठो-मीठो खाएर मनाइन्छ । यसैमा त छ मज्जा ।’ उनी भन्छन् ।

तराईमा छठ पर्वको अली बढी नै महत्व हुने भए पनि पशुपतीनगर, किसाननगर, पथलैयाका बासिन्दा दशैँ पनि छठ जत्तिकै धुमधामका साथ मनाउँछन् । उनीहरुले यस वर्ष घटस्थापनाका दिन दुर्गा मन्दिरमा कलश यात्रा समेत गरेका छन् ।

पहिला र अहिलेको तुलनामा तराइमा पर्व मनाउने तरिका फरक बन्दै गएको धेरैको बुझाइ छ । पहिले तराईमा दशैँको महत्व खासै नहुने भए पनि अहिले छठभन्दा पनि दसैंको महत्व बढी हुने गरेको धेरैको बुझाइ छ ।

दशैँलाई मध्यनजर गर्दै सुरक्षाकर्मीहरूले समेत जिल्लामा सुरक्षित वातावरण सुनिश्चित गर्न योजना बनाएका छन् । दशैँ अवधीभर कुनै अप्रिय घटना रोक्न हरेक पालिकामा हेल्पडेस्क र सुरक्षाकर्मीहरुलाई थप संवेदनशील बन्न निर्देशन दिएको महोत्तरीका प्रवक्ता दिनेश आचार्यले जानकारी दिए ।

प्रतिक्रिया

सम्बन्धित खवर

ताजा समाचार

लोकप्रिय